أن روز‌ئن دِ تومام گیلانی‌ئن ایته پیله دانه دیش خؤشان^ سقف^ جؤر دَرید و هیزاران کانال تلویزیونی‌ئه تنید بیدینید. جه من‌وتو و جِم تی‌وی بیگیفته تا بی‌بی‌سی و صدای آمریکا، بعضی از أن کانال‌ئن سلطنت طب‌ئان^ جأ حمایت بؤستن‌دَرید و بعضی از أشأن پخش‌کؤدن سریال‌ئن تؤرکی شین ایسید. أن گاو دکفته بازار^ میان أمان گیلکان^ دیل خؤش ایسه کی ایته گیلکی کانال دَریم. ایته گیلکی کانال بنام (شبکه باران). خأییم تجربه ایته روز شبکه باران دئنَ شمرأ تعریف بکؤنم و بگؤیَم.
صبح کی ویریشتید ایران^ کانال‌ئن^ میان انواع برنامه‌ئن صبحگاهی پخش بؤستن‌دره. ولی شما خأیید گیلکی برنامه بیدینید پس کؤنترلَ اوسانید و زَنید شبکه باران! شبکه باران میان ایته کؤرَ دینید کی گیلکی گب زئن دَره.
ولی چی گیلکی گب زئنی!؟ گیلکی زوان، فارسی لهجه أمرأ.
ایته واوین جه أنه گب‌ئنَ شمرأ گؤیَم: ( بریم ایتا واگردان ببینیم بعد برمیگردیم) البته أن گبَ ای‌جؤر فارسی لهجه أمرأ گه کی تؤ ویر کؤنی ای‌نفر أنه زور بکؤده کی گیلکی گب بزنه. صبحگاهی برنامه دورون ایته ماسکا عروسکم دَرید کی اتفاقا أن ماسکا عروسک کاملا لهجه گیلکی أمرأ گب زنه.
أن شب‌ئان هم ایته تاز برنامه چکودید بنام (آوای گیلان) کی گیلکی خأندن‌کسانه أورید برنامه میان و اؤشان أمرأ گیلکی گب زنید. أن برنامه تنستی ایته جه خوررم‌ترین برنامه‌ئن ببه ولی أنه مؤجری دِ پدیده ایسه. أنه مؤجری ایته زوان جدیدَ اختراع بکؤده و ایته تاز زوان بیافته. أنه زوان نام ایسه ( ایپچه گیلکی و ایپچه فارسی). چند بار من شبکه بارانَ پیام فَدم و به قول معروف انتقاد بکؤدم بیدم مؤجری برنامه انتقاد‌ئن اؤجه‌ئه فده و بگؤفت: (من افتخار می‌کنم که گیلکی‌ئه فارسی أمرأ گب می‌زنم.)
مرأ دینی!!! مرأ کارد بزه‌بی خؤن نمویی.
قرار بؤ کی أن شبکه باران گیلان^ آواز ببه. قرار بؤ کی شبکه باران أن دورسفته گیلکی پؤشت ببه و گیلکانه به خؤشان مار زوان واگردانه. ولی أن شبکه باران هیچ جذابیتی نأره و فقط ببؤسته کال رشتی! هسأ هم یه‌عده گیدی کی شبکه باران وا به گویش‌ئن مختلف گیلکی ببه. بوخودا أمان رشتی‌ئن^ ره توفیری نأره کی أنه برنامه‌ئن گویش^ رشتی أمرأ ایسه. اصلا ای‌کاش شبکه باران برنامه‌ئه شیمی گویش أمرأ چکونید تا بیدینید کال^ گیلکی گب زئن شیمی گویش^ أمرأ چی حالی دئه. تالش‌‌ئن هم کی خؤشان سر و کلله میان زئن‌دَرید کی أمان تالشی برنامه خأییم و هر کی ندانه ویر کؤنه کی گیلکان واقعا شبکه گیلکی وَ برنامه گیلکی دَرید.
هیچ نظری موجود نیست:
ارسال یک نظر